Eguberri On

Bideoa: Familia ezagutzen

Orain gabonak gertu ditugula, telebista eta beste hedabideak iragarkiz betetzen zaizkigu. Baino badago aurten bat bereziki asko gustatu zaiguna; Ikearena alegia. Bideo hau ikustea proposatzen dizuegu, uste dugulako hausnarketa oso interesgarri bat egitera bultzatzen duela.

Hausnarketarako galderak:

- Bideo hau ikusi eta gero, zure etxean antzeko zerbait gertatu daitekeela pentsatzen duzu?
- Zein uste duzu dela bideoaren mezua?
- Ba al du zerikusirik Gabonekin?
- Zer egin dezakegu horrelako egoerak saiesteko? Ze ideiak bururatzen zaizkizu?
- Eta eskolan, zer egin dezakegu benetako gabon batzuk prestatzeko?

Gogoeta: Nirekin, zurekin, elkarrekin... Gabonak eraikitzen

Nirekin, Zurekin, ELKARREKIN

Gabonak eraikitzen

Lan handia egin dugu dagoeneko eta oporren gogoz gaude. Aurreko larunbat honetan hilabete berri bati hasiera eman diogu. Eta zein uste duzue dela abenduan landuko dugun balorea edo hitza? Jakina, egun hauetan zehar “Gabonei” buruz arituko gara.

Zer dira zuretzat Gabonak? Nola ospatzen dituzu? Galdera hauei erantzuten badiegu, konturatuko gara pertsona bakoitzarentzat esanahi desberdin bat duela, eta gainera ospatzeko hamaika modu daudela. Jatorriz, jai hauek ospatzen ditugu egun hauetan Jesusen jaiotza gogoratzen dugulako. Bera izan zen Jainkoak bidali zuen mesiasa. Bera zen bere semea.

Guztiok dakigun bezala, bere gurasoak Maria eta Jose izan ziren, eta ez zuten lan erraza izan. Hainbat arazo eta gero Belenera joan behar izan zuten, eta iristen zeudela, Jesus jaiotzeko ordua iritsi zen. Azkenean ukuilu batean jaio zen, munduko umerik xumeena bezala. Bere aitak mundua salbatzera bidali zuen; bere zeregina guztiz garrantzitsua zen. Baino ez zen gaztelu edo etxe dotore batean jaio. Honekin erakutsi nahi ziguten, Jesus, gu bezalako gizakia zela; baina benetan bihotz onekoa.

Eta pentsa dezagun orain zein lan ona egin zuen, 2.000 urte eta gero, berari buruz hitz egiten jarraitzen dugula. Berak erakutsitakoak gaur egun oraindik oso baliagarriak dira, bere ideiak eta baloreak ez dira zaharkitu. Berak esan zuen moduan, munduan dagoen gauzarik garrantzitsuena maitasuna da. Honi esker munduan bakean bizi gaitezkelako.

Gure leloak dion bezala, “nirekin, zurekin, Elkarrekin” gabonak eraikiko ditugu. Azken batean gabonak ospatu ahal izateko, elkarrekin egon behar dugu. Horregatik gehiengoak familiarekin biltzen gara jai hauek ospatzeko; kaleak eta etxeak apaingarriz betetzen dira, opariak jaso eta egiten ditugu, lagunei postalak bidaltzen dizkiegu… Baina azken batean, hauek guztiak maitasunaren seinale dira.

Gogoetarako galderak:

-         Zuk nola ospatzen dituzu jai berezi hauek?

-         Zer esan nahi dute?

-         Zer da gehien eta gutxien gustatzen zaizuena?

-         Ze sentimendu sortarazten dizkizu?

Keinua: OTOITZA

Begia naiz baina ez naiz ibili,

eskua naiz baina ezin dut ikusi,

bihotza naiz baina ezin dut abestu,

burua naiz baina ezin dut eutsi,

belarria naiz baina ezin dut ukitu,

ahoa naiz baina ezin dut besarkatu,

oina naiz baina ezin dut hitz egin,

bizkarrezurra naiz baina ezin dut arnastu,

birika naiz baina ezin dut pentsatu,

hezurra naiz baina ezin dut sentitu,

azala naiz baina ezin dut entzun,

ilea naiz baina ezin dut dastatu...

Gorputz-atalek elkarren beharra dute,

ahulak dira-ta.

Elkarrekin, alabaina, dena ahal dute.

Horixe gertatzen zaigu geuri ere,

Elkarrekin eta zurekin, dena ahal dugu.

Bideoa: ELKARBANATU laburmetraia

Zer gertatzen da SOLIDARIOAK garenean? Bideo hau solidaritateari eta elkarnabanatzeari buruzko gogoeta da. Benetan garrantzitsuak diren gauzak altruistak dira. Gure alde dagoen guztia jarri behar dugu gure inguruan begiratzeko eta SOLIDARITATEA zaintzeko.

-       Zer gertatzen zaio bideo honetako pertsonaia nagusiari?

-       Zer gertatzen da SOLIDARIOAK garenean?

-       Zer egin dezakezu zuk solidarioa izateko?

Ipuina: GORPUTZEAN BORROKA

Egun batean ezkerreko eskuak esan zion eskuinekoari: “Hara, gu egun osoan lanean ari gara eta urdailak ez du ezertxo egiten”.

Hankek, hori entzun ondoren, esan zuten: “Arrazoia duzu, gu ere nekatuta gaude. Hara eta hona ibiltzen gara, urdailarentzat jateko bila, eta urdailak, berak, jan baino ez du egiten.

Eskuineko eskuak oihu: “Ez diogu jaten emango, ea nola konpontzen den”.

Orduan, urdailak hitz egin zuen: “Lagunok, oker zabiltzate. Gure zeregin edo eginkizunak desberdinak dira, bakoitzak berea du, baina denok elkarren beharrean gaude”.

Besoek oihuz erantzun zioten: “Zaude isilik! Alferren kontuak dira horiek. Aurrerantzean ez duzu ezer jango, ezer ez!

Horrela, jan gabe, zenbait egun igaro ziren.

“Altxatzeko indarrik ere ez daukat”, esan zion egun batean beso batek besteari.

“Ezta nik ere. Makal-makal nago”, erantzun zion besteak

Hankak ere kexatu ziren: “Guk ezin dugu zirkinik egin”.

Eta gorputz-atal guztiek antzeko gauzak esan zituzten. Denak ahul zeuden.

Orduan urdailak hitz egin zuen: “Ni ere oso larri nago. Jaten ematen badidazue, lanean hasiko naiz berriro… eta denok indarberritu, sendatu eta hobeto sentituko gara”.

“Tira, proba dezagun”, esan zuen eskuineko eskuak.

Hankek, nekez, gorputza mahaira eraman zuten. Beso eta eskuek jatekoa ahoan sartu zioten, … eta handik denbora gutxira eskuek esan zuten:

“Hara, hobeto gaude orain”.

Banan-banan gorputz-atal guztiek gauza bera esan zuten. Orduan ulertu zuten denek elkarri lagundu behar ziotela osasuntsu eta ondo egoteko.

Ez ahaztu: denok gara garrantzitsuak, denok egin dezakegu zerbait gizartearen onerako, denon onerako.

GALDERAK

·         Zer izan da zuretzat deigarriena ipuin honetan?

·         Noiz berreskuratzen du berriz gorputzak osasuna?

·         Zer bururatzen zaizu gizartea hobetzeko egin behar duguna?

GOGOETA: Nirekin, zurekin, elkarrekin SOLIDARIOAK izaten MARIAren antzera.

Aurtengo leloa behin eta berriro errepikatzen ari gara eta dagoeneko uste dugu ondo dakigula: Nirekin, zurekin, elkarrekin... Hilabete honetan Maria Haurraren festa ospatuko dugu. Jai hau 1610. urtean ospatu zen lehen aldiz eta hainbeste urteetan ospatu den honek Mariari buruz hitz egiten digu. Santa Juanak bere eskoletako pertsona guztiak Mariaren babesean jartzea nahi izan zuen. Zergatik? Ba... Mariaren antzeko, gu ere solidarioak izan gaitezen. Horregatik hilabete honetan zehar hainbeste aldiz entzungo dugu solidaritatea hitza. Imaginatzen al duzu munduan guztiok bat egiteko gai izango bagina?

Aurten HAITIn, jorratuko dugu BEDOU izeneko proiektua, Mariaren Lagundiak duen eskola txikian laguntzen. Azken urteotan Haiti oso herrialde zigortua izan da, lurrikarak eta zikloiak izan direla eta. Oso toki txiroa da eta gure laguntza behar dute aurrera egiteko.

Santa Juanak eta Mariak gure inguruan daudenei eskua luzatzea erakutsi ziguten. Beraz, hilabete honetan Mariaren jarrera gogoratuko dugunez, inoiz baino solidarioagoak izatera gonbidatzen zaituztegu. Horregatik, solidaritatea ahaztu gabe, Irun eta inguruko herrietako pertsonaia behartsuak ere lagunduko ditugu. Lehengo urtean egin genuen bezala, elikadura bilketa egingo dugu Caritas-era bidaltzeko.

Beraz, prest al gaude solidarioa izateko eta nirekin, zurekin, elkarrekin mundu hobe bat eraikitzeko?

Nirekin, zurekin, elkarrekin solidarioak izan gaitezen MARIAren antzeko!